Kirurg

Barnekirurgen behandlar medfødde misdanningar, skadar og sjukdommar hos nyfødde, spedbarn, barn og ungdom.

Som barnekirurg opererer du i brystkasse, mage og tarmsystemet, urinvegane og du fjernar svulstar. Du kan også operera i andre organsystem – utanom hjarte, skjelett og sentralnervesystem.

Ein del operasjonar på barn, som blindtarmsbetennelse, blir ofte gjennomført av andre kirurgar, medan barnekirurgen tek seg av meir komplekse tilstandar og operasjonar på nyfødde. Operasjon av medfødde misdanningar hos barn er ei av dei vanlegaste arbeidsoppgåvene.

Barnekirurgen samarbeider tett med sjukepleiarar, barnelegar, anestesilegar, kirurgar, patologar og andre legespesialistar.

Ein bryst- og endokrinkirurg er ein lege og kirurg som har spesialisert seg på å behandla sjukdommar i bryst, skjoldbruskkjertel og biskjoldbruskkjertler.

Bryst- og endokrinkirurgen bruker operative metodar for å behandla sjukdommar som brystkreft, struma, godarta og vondarta svulstar i skjoldbruskkjertelen og dessutan hormonelle forstyrringar i skjoldbruskkjertel og biskjoldbruskkjertel.

Bryst- og endokrinkirurgen greier ut hormonproduserande kjertelsvulstar i mage, tarm og binyrer, og opererer pasientar i samarbeid med andre kirurgar, til dømes gastrokirurger og urologar. Spesialistar i bryst- og endokrinkirurgi kan også samarbeida med øre-nase-halsspesialistar og thoraxkirurger om svulstar eller struma.

Ein øre-nase-hals-spesialist er ein lege som har spesialisert seg innan det medisinske fagfeltet øre-nase-hals (ØNH), som også blir kalla hode-halskirurgi. ØNH-spesialisten diagnostiserer og behandlar sjukdommar, betennelsar, misdanningar, svulstar og skadar i øre-nase-hals-området.

ØNH-spesialistane utfører mange kirurgiske inngrep, til dømes fjerning av mandlar, ventilasjonsrøyr i øyra, operasjonar på naseskiljevegg og bihuler og større operasjonar på grunn av kreft i området. Også ikkje-kirurgiske behandlingar utgjer ein stor del av arbeidskvardagen, eksempelvis behandling av allergi, svimmelheit, høyrselstap og infeksjonar.

Ein nevrokirurg er ein lege som har spesialisert seg på det medisinske feltet nevrokirurgi.

Nevrokirurgar driv først og fremst med kirurgisk behandling av hode- og nakkeskadar, hjernehinneblødingar, svulstar, medfødde misdanningar, infeksjonar, degenerative sjukdommar (naturlege aldringsforandringar) i nakke og rygg, epilepsi, kroniske smerter og spasmar.

Mange av tilstandane er alvorlege og krev snarleg behandling og overvaking.

Nevrokirurgar har eit nært samarbeid med spesialistar i nevroradiologi og nevroanestesi.

Ein plastikkirurg er ein lege som har spesialisert seg på det medisinske fagfeltet plastikkirurgi. Plastikkirurgiske inngrep kan gjerast som rekonstruksjon etter skadar, sjukdommar eller medfødde misdanningar eller av kosmetiske grunnar. Under utdanninga som plastikkirurg lærer ein både rekonstruktive og kosmetiske teknikkar.

Vanlege arbeidsoppgåver for ein rekonstruktiv plastikkirurg:

• byggja opp igjen funksjonen eller betre utsjånad til menneske som har fått skadar, sjukdom, har hatt andre operasjonar eller er fødde med misdanningar
• gjennomføra alt frå mindre operasjonar og lokalbedøving, til store kompliserte inngrep

Vanlige arbeidsoppgåver for ein kosmetisk plastikkirurg:

• behandla friske menneske som ønskjer å forandra på kroppen sin, og vanlegvis ikkje menneske med skade eller sjukdom
• fjerne til dømes hud, fettvev eller endra på utsjånaden i ansiktet

Som thoraxkirurg er du lege og kirurg med spesialisering på det medisinske fagfeltet thoraxkirurgi. Thoraxkirurgen behandlar skadar, sjukdommar og misdanningar i brystkassa, inkludert hjarte, lunger og sentrale kar.

Thoraxkirurgen behandlar mellom anna medfødde hjartefeil hos barn og vaksne, rekonstruerer arteriar og vener, utfører bypassoperasjon og hjarteklaffeoperasjonar, hjarte- og lungetransplantasjonar, opererer lungekreft og andre sjukdommar i brystkassa.

Som urolog er du lege med spesialisering på det kirurgiske feltet urologi. Det vil seia læra om sjukdommane i nyrene, urinvegane og mannlege kjønnsorgan. Urologen diagnostiserer, opererer og på andre måtar behandlar sjukdommar som til dømes kreftsjukdommar, infeksjonar, nyrestein, vasslatingsproblem, impotens, underlivssmerter, urinlekkasje og skadar.

Urologen er kirurg og bruker derfor ofte kirurgiske metodar i behandlinga, både opne operasjonar og ulike kikhòlsteknikkar. Biletundersøkingar som ultralyd, CT og MR blir brukt ved undersøkingar.

Urologar jobbar mykje med pasientar som har kreft. Sidan du som urolog følgjer pasientane over lengre periodar, anten det er kreftsjukdom eller godarta sjukdom, får du ofte eit nært forhold til pasientane. 

Ein ortoped er ein lege med spesialisering innan ortopedisk kirurgi. Ein ortoped er ein lege som førebyggjer og behandlar sjukdommar og skadar i musklar og skjelett.

Ortopedi er eit stort kompetansefelt med behandling av sjukdommar og skadar i musklar og skjelett for både barn og vaksne. Det kan dreia seg om mellom anna brotskadar, slitasjeskadar, skadar i sene- og muskelapparatet eller svulstar.

Yrkestittelen kan også vera ortopedisk kirurg.