Geriatar

Geriatrar er legar som har spesialisert seg på sjukdommar hos eldre menneske. Som geriatar er du ekspert i å undersøkje, stille diagnose og behandle eldre pasientar. Geriatri dekkjer både akutte felt som akuttgeriatri og behandling av hjerneslag. Det omfattar òg utgreiing av pasientar og arbeid med rehabilitering.

I møte med eldre pasientar er det viktig å sjå heile mennesket. Desse pasientane har ofte fleire sjukdommar samtidig og brukar mange ulike medisinar. Demens, hjerneslag, hjartesjukdom, lungesjukdom og beinskjørheit er vanlege tilstandar hos eldre.

Som geriatar treng du god kunnskap om aldring og samansette helseplager. Du må òg forstå bruk av medisinar og moglege problem dette kan gi hos sårbare pasientar. Ein viktig del av arbeidet er å førebyggje sjukdom og gi råd til pasientar og pårørande.

Rundt dei geriatriske pasientane jobbar ofte eit team av lege, sjukepleiar, fysioterapeut og ergoterapeut. Behovet for geriatrisk kunnskap aukar fordi folk lever lenger med fleire kroniske sjukdommar. Dei blir dermed meir sårbare. Denne kunnskapen er òg viktig i andre fagfelt, som ortopedi. Her vurderer ein eldre pasientar før operasjonar. Geriatrar gjer heilskaplege vurderingar av eldre som skal ha kreftbehandling eller hjarteoperasjonar. Desse vurderingane er viktige for å unngå både for mykje og for lite behandling av eldre pasientar.

Geriatrar samarbeider ofte med psykiatrar, allmennlegar og nevrologar for å få eit heilskapleg bilete av sjukdomssituasjonen og -historia til pasienten.

Vanlege arbeidsoppgåver for ein geriatar:

• undersøkje og behandle eldre pasientar med fleire samtidige sjukdommar

• gjennomgå og tilpasse medisinar for å unngå uheldige biverknader

• greie ut årsaker til plutseleg funksjonstap hos eldre, som forvirring, fall eller problem med vasslating

• undersøkje pasientar for mogleg demens eller årsaker til gjentekne fall

• vurdere pasienten sitt funksjonsnivå og sårbarheit for å bestemme vidare behandling eller rehabiliteringsmoglegheiter

• samarbeide med eit tverrfagleg team, inkludert fysioterapeutar, ergoterapeutar, sjukepleiarar, ernæringsfysiologar, sosionomar og logopedar

• gi råd om sjukdomsførebygging og tilpasse behandling til eldre sine individuelle behov

• bidra til smertelindring og omsorg ved livets slutt

• vurdere pasienten sitt behov for hjelpemiddel, heimehjelpeller sjukeheimsplass