Tømrar

Som tømrar bygger og monterer du ulike typar trekonstruksjonar og innreiingar, i tillegg til å rehabilitere eldre konstruksjonar.

Vanlege arbeidsoppgåver for ein tømrar:

• bygging av trehus og andre konstruksjonar i tre
• innreiing av hus i tre, mur, stål eller betong
• rehabilitering og vedlikehald av bygningar
• produksjon og montering av element og modular
• planlegge eigne arbeider, og samordne arbeidet med andre fag og aktørar
• lesa og forstå teikningar og konstruksjonar

Tømrarar utgjer ei stor yrkesgruppe. Småhus blir for det meste bygd i tre, medan større næringsbygg ofte blir bygd i stål og betong med utfyllande bindingsverk av trevirke i ytterveggane. Det blir òg stadig meir vanleg å bygge store hus av massivtre.

Tømraren utfører òg innreiingsarbeider i alle typar bygg, slik som oppsetting av innvendige vegger, isolering, platekledning, panelering, montering av dører og vindauge og kjøken og legging av parkett og lister.

Det er òg tømrarens jobb å halde ved like eksisterande trehus, og oppgradere dei til dagens – eller ein betre – standard. Dette blir kalla rehabilitering.

Når gamle bevaringsverdige trehus skal førast tilbake til opphavleg eller ein tidlegare tilstand, blir det kalla restaurering. Dette krev at tømraren har kunnskap og kompetanse om tidlegare byggemetodar og materialkvalitetar.

Som tømrar arbeider du ut frå rutinar, teikningar og arbeidsbeskrivingar. Arbeidsmetodane omfattar både handverktøy, elektrisk verktøy og meir avansert utstyr. Det er også vanleg at tømraren brukar digitale hjelpemiddel som oppslagsverk og for å dokumentere arbeidet.

Ein tømrar må utføre arbeidet på ein rasjonell og sikker måte som tilfredsstiller krav til helse, miljø og sikkerheit (HMS). 

Tømraren arbeider nokre gongar sjølvstendig, men ofte saman med kollegaer og med yrkesgrupper som murarar, blikkenslagarar, betongfagarbeidarar, 
målarar, elektrikarar og røyrleggarar.