Grunnskolelærar

Grunnskolelærarar er lærarar i grunnskolen, og spesialiserer seg til å jobbe med 1. til 7. trinn eller 5. til 10 trinn.

Som grunnskolelærar skal du leggje til rette for læring, utvikling og gode haldningar hos barn og unge. Det betyr at du skal førebu, gjennomføre og vurdere undervisninga på bakgrunn av skulens verdigrunnlag og læreplanane for faga.

Du bruker den faglege, pedagogiske og profesjonsetiske kompetansen din for å leggje til rette for at alle elevar kan lære på ein best mogleg måte. Profesjonsetikk er å basere arbeidet ditt på etiske verdiar som til dømes respekt, personvern, menneskeverd og profesjonell integritet. 

I tillegg til undervisning i ulike undervisningsfag spelar læraren ei viktig rolle i barn og unges sosialisering. Grunnskolelæraren skal engasjere seg i elevane sin skolekvardag, og følgje med på kvar enkelt elevs personlege utvikling – både fagleg og sosialt. Som lærar må du òg handtere mange ulike situasjonar, til dømes mobbing.

Nokre elevar kan ha behov for ekstra hjelp, og da skal du bidra til å få laga eit pedagogisk opplegg som gjer det enklare for desse elevane å lære. Dette kan gjerne gjerast i samarbeid med ein spesialpedagog. 

Grunnskolelæraren samarbeider tett med lærarkollegaer, rektor/skoleleiar, undervisningsinspektør, avdelingsleiar og andre tilsette ved skolen. Det er også viktig å ha eit godt samarbeid med foreldre.

Grunnskolelærar var tidlegare kalla allmennlærar. Omgrepet allmennlærar vil sannsynlegvis brukast i mange år framover for lærarar som underviser i grunnskolen. Grunnskolelærarutdanninga er no ei mastergrad, og nyutdanna grunnskolelærarar er lektorar. Lektor er eigentleg tittelen på ein lærar som har tatt ei mastergrad, og vert ofte brukt om lærarar som underviser i vidaregåande opplæring.

Grunnskolelærarar kan òg ha tittelen adjunkt.