Audiograf

Du kombinerer teknologi, helse og rådgjeving for å utgreie høyrsel, finne gode tiltak og hjelpe menneske med å høyre og kommunisere best mogleg.

Audiografen møter menneske i alle aldrar, som treng hjelp med sin høyrsel. Dette kan vere alt frå spedbarn til eldre med ulike høyrselsutfordringar, behov og livssituasjonar.

Vanlege arbeidsoppgåver for audiografar:

• undersøke høyrsel og utrgreie høyrselstap, tinnitus og andre høyrselsrelaterte utfordringar
• tiltak for å betre eller kompensere for nedsett høyrsel gjennom habilitering og rehabilitering. Dette kan mellom anna innebere tilpassing og oppfølging av høyreapparat og andre høyrselstekniske hjelpemiddel
• rådgjeving og rettleiing til både pasientar og pårørande

For dei fleste med nedsett høyrsel kan høyreapparat gjere ein stor forskjell. Som audiograf er du ekspert på å finne, tilpasse og følgje opp høyreapparat, slik at tale og lydar igjen kan bli ein naturleg del av kvardagen. Men jobben handlar om meir enn teknologi. Som audiograf skal du også motivere og rettleie pasientane, slik at høyreapparatet blir tatt i bruk og kan gje best mogleg effekt.

Ei viktig oppgåve for audiografen er å forklare korleis høyrselen fungerer og fortelje om sosiale konsekvensar av hørselstap, tekniske hjelpemiddel og pasientrettigheiter. Det er også svært viktig å lage eit bilete av korleis nedsett høyrsel kan påverke mennesket sin hjerne.

For spedbarn kan høyreapparat gje dei moglegheita til å høyre lydane dei treng for å utvikle talespråk. Hos vaksne og eldre kan god høyrselsrehabilitering gjere det lettare å kommunisere, delta sosialt og oppretthalde aktivitet og livskvalitet. Ubehandla høyrselstap kan ein også forbinde med auka risiko for kognitiv svikt og demens. Høyreapparat er også viktige for å få med seg kva som skjer i omgjevnadane.

Statistisk sett har kvar femte nordmann ein eller annan form for høyrselshemming.

Sjølv om du som ferdig utdanna audiograf kan jobbe sjølvstendig, vil eit tverrfagleg samarbeid med øyre-, nase- og halsspesialist, audiopedagogar og audioingeniørar gje eit sterkare tilbod. Audiografar samarbeider også med andre helse- og faggrupper ut frå pasienten sitt behov.