Klinisk ernærings­fysiolog

Ein klinisk ernæringsfysiolog undersøker, stiller diagnosar, rettleier om førebygging og behandlar sjukdomar og tilstandar knytt til kosthald, og tilstandar som påverkar mellom anna omsettinga og trongen til næringar. 

Vanlege arbeidsoppgåver for ein klinisk ernæringsfysiolog:

• kartlegge og vurdere behova til klienten basert på sjukehistoria, høgde, vekt og relevante blodprøvar
• tilråde behandling, som for eksempel å justere kosthaldet, byrje med spesialkost, næringsdrikker eller intravenøs næring
• behandle menneske som har ein sjukdom eller ei annan tilstand relatert til kosthald og ernæring
• rettleie innan kosthald og ernæring
• gi opplæring til pasientar, pårørande, barnehagar, skolar og helsepersonell
• folkehelsearbeid, som for eksempel å utvikle informasjonsmateriell om kosthald og ernæring
• førebyggje, rettleie og behandle såkalla livsstilssjukdommar, som hjarte- og karsjukdom, diabetes type 2 og overvekt

Arbeidsoppgåvene vil variere etter kvar du jobbar.

For enkelte sjukdommar er ei endring i kosthald den einaste behandlingsmetoden, til dømes ved cøliaki, matallergi, matintoleranse eller medfødde metabolske sjukdommar. 

Som klinisk ernæringsfysiolog kan du òg jobbe med friske og sjuke barn si vekst og utvikling, eller med kroniske eller akutte sjukdommar hos vaksne i alle aldra, til dømes kreftsjukdom, mage-tarmsjukdom eller lungesjukdom. Du kan òg drive med forsking. 

Klinisk ernæringsfysiolog er ein beskytta tittel som krev autorisasjon frå Helsedirektoratet. Merk at liknande yrkestitlar som ernæringsekspert, ernæringskonsulent og ernæringsrådgjevar ikkje er det same som klinisk ernæringsfysiolog og at desse ikkje er beskytta titlar.