Naturforvaltar

Som naturforvaltar har du gode kunnskapar både om mangfaldet i naturen, og om lover og reglar for korleis ein skal, og kan, forvalta ressursane i naturen.

Ein naturforvaltar er oppteken av korleis ein kan skjerma naturen mot inngrep, og korleis ein kan utnytta dei ressursane naturen gir på ein fornuftig måte. Du baserer gjerne arbeidet ditt på økosystem-tankegang. Økosystem er samfunn av levande og døde organismar, til dømes eit fjellvatn, ein fjord eller eit skogsområde.

Naturforvaltarar har kompetanse innan mange fagfelt, både biologi, økologi og samfunnsfag og det finst mange spesialiseringar innan fagområdet; viltforvaltning, fiskeforvaltning, miljø- og ressursøkonomi, landskapsøkologi, vassforureining, ferskvassøkologi, økotoksikologi med meir.

Vidare er det relevant for naturforvaltarar å ha kunnskap om GIS (grafisk informasjonssystem). Grunnen til det er fordi digitale kart og geografiske data er heilt nødvendige for å analysera naturverdiar, planleggja arealbruk og forvalta naturressursar på ein berekraftig måte.

Vanlege arbeidsoppgåver for ein naturforvaltar:

• laga ei konsekvensutgreiing om natur- og miljøomsyn for utbyggingsprosjekt
• vurdera prosjekt i naturen med tanke på lovverket om naturverdiar og naturressursar
• kunnskapsinnhenting om økosystem, artar og friluftsliv
• leia ulike prosjekt
• laga planar for bruk og forvaltning av naturen
• bidra i arbeidet med kommuneplanar eller anna planverk
• rettleia andre fagpersonar og instansar
• skriva rapportar og utgreiingar
• restaurering og skjøtsel av naturområde
• tilrettelegging og samarbeid med organisasjonar når det gjeld friluftsliv

I dette yrket er det gode sjansar for å kunna ferdast ute i naturen i delar av arbeidstida. Det gjeld spesielt om du jobbar som naturoppsyn eller fjelloppsyn (tidlegare kalla naturoppsynsmann og fjelloppsynsmann).

Naturforvaltarar samarbeider ofte med andre fagpersonar, som til dømes biologar.