Interiørarkitekt

Ein interiørarkitekt formar romma vi brukar kvar dag. Dei jobbar med å skape rom som er både fine, nyttige og miljøvenlege. Dette kan vere i private heimar eller i bygg som skular, sjukehus, kontor, butikkar og kulturbygg. Kvart prosjekt tek omsyn til både kva brukaren treng og kva bygget gir av moglegheiter.

Jobben til ein interiørarkitekt skiftar med storleiken på prosjektet. Dei fleste prosjekt følgjer likevel ein fast plan. Først gjer dei ein analyse av staden og kartlegg bygget sine moglegheiter. Dei finn òg ut kva kunden ønskjer seg. Ut frå dette lagar dei eit konsept som dei viser fram med skisser og bilete.

Etter skissene lagar dei meir presise teikningar. Desse viser korleis romma skal sjå ut, kva løysingar dei vel og kva fargar og materiale som skal brukast. I denne fasen må dei jobbe tett med kunden, arkitektar og andre fagfolk for å sikre at ideane kan byggjast. Ofte følgjer interiørarkitekten prosjektet heilt til det er ferdig. Dei er med på byggeplassen og hjelper til om det oppstår problem undervegs.

Vanlege arbeidsoppgåver for ein interiørarkitekt:

• planlegg og designar rom som er nyttige og miljøvenlege

• fornyer gamle bygg og tilpassar dei til ny bruk med fokus på gjenbruk og god bruk av plass

• sørger for at rom kan brukast av alle menneske, uansett alder eller funksjonsevne

• lagar 3D-modellar og teikningar med fagprogram for å vise idear og hjelpe til med å byggje dei

• vel materiale, fargar, møblar og tekstilar som gir god funksjon, rett stemning og sunt inneklima

• designar møblar og spesialtilpassa løysingar for kvart enkelt prosjekt

• planlegg belysningsløysingar som passar til rommet sin bruk og stemning

• undersøkjer behov, samarbeider med brukarane og sikrar god dialog mellom alle fagfolk

• bereknar kostnader, hentar inn anbod frå leverandørar og leier prosjekt frå start til slutt

Interiørarkitekten samarbeider med oppdragsgivarar, byggherrar, arkitektar og andre fagfolk. 

Interiørarkitektar kan òg jobba med mykje av det same som ein interiørkonsulent. Men dei har lengre utdanning og kan ta større jobbar. Dei må kjenne alle reglar og lover for faget. Norske interiørarkitekters og møbeldesigneres landsforening (NIL) autoriserer interiørarkitektar på masternivå. Med denne autoriseringa kan dei bruke tittelen interiørarkitekt MNIL.