Byggingeniør

Som bygg- og anleggsingeniør er hovudoppgåva di å planleggja og prosjektera nye bygg og anlegg. I tillegg til dette, kan du også fokusera på å utvikla berekraftige og miljøvennlege løysingar for framtidas byggje- og anleggsprosjekt.

Bygg- og anleggsingeniøren speler ofte ei leiande rolle på byggje- og anleggsplassar, der dei er ansvarlege for å greia ut, planleggja, prosjektera og gjennomføra byggje- og anleggsprosjekt. Desse prosjekta kan vera både lokalt og internasjonalt. Tverrfagleg samarbeid er ein viktig del av jobben og inneber tett samarbeid med andre fagpersonar som til dømes arkitektar og byggherrar.

Ein bygg- og anleggsingeniør har djup kunnskap om konstruksjonar og materiale som tre, stål og betong, som ofte blir brukt i bygging av hus, bruer og annan infrastruktur. Dei jobbar også med moderne teknologiar innan konstruksjonsteknikk, vass- og miljøteknikk, infrastruktur, leiing og HMS.

Vanlege arbeidsoppgåver for ein byggingeniør:

• fagleg rådgiving
• planleggja bygg, bruer, vegar og kommunaltekniske anlegg
• ta omsyn til fysiske og miljøproblemstillingar når nye prosjekt skal setjast i gang
• ha kunnskap om ulike typar underlag og vurdera om visse område er eigna for utbygging
• greia ut prosjektkostnader
• prosjektering
• teikna konstruksjonar og planteikningar
• gjennomføra inspeksjonar på anleggsplassar for å sikra at arbeidet blir utført etter planen
• uavhengig kontroll på prosjektering og utføring og tredjepartkonroller
• prosjekteringsgruppeleiar (PGL) / prosjektleiar (PL) – rolle i prosjekt
• forvaltning, drift og vedlikehald av eksisterande bygg

Det finst mange ulike retningar innan bygg og anlegg, som til dømes landmåling, arealplanlegging, energi og miljø.

Bygg- og anleggsingeniørar kan til dømes utføra landmåling og arealplanlegging for kommunar og andre utbyggjarar. Som byggingeniør kan du også ha ansvar for at teknisk utbygging av vass- og avløpsanlegg fungerer.

Som bygg- og anleggsingeniør er du ikkje berre med på å teikna bygningar – du er med på å forma framtidssamfunnet. Du planlegg og utviklar løysingane som skal bera morgondagens byar, infrastruktur og miljø.

Her er ei liste over andre ingeniøryrka/spesialistane som er relaterte til bygg, anlegg og infrastruktur:

• byggingeniør (bygningar)
• anleggsingeniør (veg og bane)
• bygningsakustikar
• bygningsfysikar
• brannteknikk
• geoteknikk
• vasskraftproduksjon og damtryggleik
• vatn og miljøteknikk (VA)
• eigedomsutvikling
• prosjektleiing bygg og anlegg