Aksjemeklar

Bedrifta aksjemeklarar jobbar for blir kalla for meklarhus. Som aksjemeklar er du tilsett der, og handlar aksjar på vegner av kundane til meklarhuset. Når ein kunde kjøper aksjar vil det seia at dei kjøper ein del av eit selskap. Kunden kan tena pengar på dette ved at selskapet gjer det bra. Då vil verdien av aksjane stiga, og dei kan selja aksjane for meir enn det dei har kjøpt dei for. Dei kan også tapa pengar, dersom selskapet dei kjøpte aksjar i ikkje gjer det bra.

Som aksjemeklar kan du både ha selskap og privatpersonar som kunde. Ein typisk arbeidsdag for ein aksjemeklar er ofte ganske lang. Aksjar og andre verdipapir blir kjøpte og selde i Børsens opningstid frå 9:00-16:30. I tillegg må aksjemeklarar jobba både før og etter opningstida. Denne tida går til møte, planlegging, oppdateringar i marknaden og oppfølging av kundar. Som aksjemeklar må du derfor rekna med lange arbeidsdagar.

Meklarhus ser ofte etter personar som er entusiastiske og målretta. Det er viktig å kunna visa tilbake til gode resultat på skulen, men det er kanskje endå viktigare å skaffa seg erfaring gjennom engasjement i til dømes relaterte skuleprosjekt, sommarjobb og Intership i bank, meklarhus eller andre finansinstitusjonar. Salserfaring er også veldig relevant for dette yrket.

Nokre vanlege arbeidsoppgåver for aksjemeklarar er:

• Kjøpa og selja aksjar og andre verdipapir for kundar.
• Gi råd og tips til kundane om kva aksjar dei bør selja eller kjøpa, ut ifrå analysar av marknaden som finansanalytikarar har gjort.
• Erfarne aksjemeklarar kan også gi råd ut ifrå eigne oppfatningar og kjennskapar til behovet til kundane.
• Økonomisk rådgiving til kundane, til dømes gjennom å tilrå kunden å kjøpa eller selja bedrifter i ein marknad.
• Skaffa aksjekapital til bedrifter som har behov for å styrkja eigenkapitalen. (Eigenkapital vil seia summen av det bedrifta eig – utan gjelda.) Dersom du jobbar med dette, vil du jobba tett med kundane og ha mykje kundekontakt.