Grafisk designar

Grafiske designarar formar ut visuell kommunikasjon. Dei utviklar visuelle konsept og utarbeider designelement som skal informera, inspirera eller fengja målgrupper. Det kan til dømes vera å byggja opp den visuelle identiteten til ein organisasjon eller eit produkt. Målet er at ein bodskap, eit produkt eller ei teneste skal ha ei grundig gjennomtenkt form og utsjånad, for at dei som skal sjå eller bruka designa, skal forstå det best mogleg.

Grafiske designarar jobbar praktisk, estetisk og handverksmessig, så vel som analytisk, abstrakt og problemløysande. Det betyr at dei har konkrete ferdigheiter innan *formgiving og kan visualisera ein bodskap på ein god måte.

Nokre gongar jobbar grafiske designarar med å utvikla eit design basert på ein kunde sin idé. Andre gongar gjer designaren heile prosessen frå å undersøkja ut kva designen skal oppnå, og kven målgruppa er, til ferdig utvikla design, ved hjelp av Design *thinking.

I arbeid med merkevarebygging må ein grafisk designar jobba strategisk. Å jobba strategisk betyr at designaren har sett seg inn i forretningsideen og meininga med merkevara, og sørgjer for at designløysinga bidreg til ei oppleving som støttar opp om bodskapen. Derfor bør designarane òg vera analytiske, det betyr at dei har ei evne til å setja seg djupt inn i noko, og sjå samanhengar.

Designarar gir råd til kundar slik at dei kan ta gode kommunikasjonsval. Råda ein designar gir vil vera veldig ulike basert på behovet til kunden. Val av design vil variera mykje om kunden driv til dømes online klesbutikk, restaurant eller fiskefabrikk.

Grafiske designarar kan òg jobba retta mot visuelle konsept og idear knytt til samfunnsmessige oppgåver i politikk, utdanning, organisasjonsarbeid og liknande. Dette kan innebera å laga design som skal bidra til bevisgjering, læring eller spreiing av informasjon.

Vanlege arbeidsoppgåver for grafisk designar:

• Ha møte med kundar om prosjekt
• Lage idéar og skisser på moglege visuelle retningar som blir presenterte for kunden.
• Utvikle og ferdigstilla eit visuelt konsept som gir ei heilskapleg og god løysing på behovet til kunden. Til dømes ein ny identitet for ei bedrift med logo, designelement og webside.
• Utvikle, designe og ferdigstille visuelle element og malar ved hjelp av digitale designverktøy.
• Tilpasse, endre eller oppdatere eksisterande design.
• Designe innpakning til eit nytt produkt eller eit eige skiltsystem for eit område, til dømes ein flyplass.
• Samarbeide med andre faggrupper, som trykkjeri, fontdesigner, motion designar, frontend utviklarar, interaksjonsdesignarar, industridesignarar, reklameteam, animatørar, illustratørar, tekstforfattarar, journalistar eller fotografar.

Grafisk design endrar seg i takt med teknologien og grafiske designarar må derfor vera oppdatert på metodar, programvare og verktøy, og dessutan trendar, brukarbehov og stilval. 

Ofte er grafiske designarar ein del av tverrfaglege team med andre yrkesgrupper som til dømes interaksjonsdesignarar, industridesignarar, reklameteam, animatørar, illustratørar, tekstforfattarar, journalistar eller fotografar. 

Oppgåvene til ein grafisk designar varierer mykje med kva rolle dei tek.

Til dømes:

• Kreativ leiar for team av designarar og andre som skaper heilskaplege visuelle konsept og designløysingar for kundar.
• Interaksjonsdesignar som kartlegg behovet til brukarane og bidreg til å designa eit sluttprodukt som er enkelt å forstå og bruka.
• Illustratør som lagar illustrasjonar som kommuniserer og forsterkar ein bodskap eksempelvis i reklame, informasjonsnettsider og lærebøker.
• Pakningsdesigner som sørger for at produkt får ein utsjånad som appellerer til brukarane og kommuniserer innhaldet på riktig måte. 
• Webdesignar som gjer heile jobben med utviklinga og formgivinga av ei enkel webside.

Kompetansen til ein grafisk designar er stadig aktuell i utforminga av trykkåker, animasjonar, logoar, fontar, nettbaserte løysingar, appar, bøker, emballasjar og all anna form for kommunikasjon.