Sosiolog

Sosiologar studerer forholdet mellom menneske. Sosiologen sitt arbeid går ut på å undersøke ulike sider av eit samfunn og korleis menneske formar samfunnet rundt seg.

Det finst mange ulike retningar innan sosiologi, og sosiologar spesialiserer seg gjerne innan ei eller fleire retningar.

Vanlege arbeidsoppgåver for ein sosiolog:

• skriva notat, rapportar og utgreiingar
• samla inn, analysera og tolka statistiske data, og omarbeida dei for offentleg publisering
• analysere korleis politiske avgjerder eller økonomisk utvikling påverkar samfunnet, sosiale relasjonar eller for individet
• formulere og analysera alternative løysingar på samfunnsmessige/sosiale/individuelle utfordringar
• prosjektarbeid og prosjektstyring
• gjennomføre kvalitative undersøkingar, analysar og evalueringar
• undervise studentar og drive forskings- og utviklingsarbeid

Nokre retningar innan sosiologi:

• funksjonalisme – korleis handlingar og institusjonar har ei funksjon eller rolle i sosiale samanhengar
• sosialpsykologi – korleis tankar, kjensler og åtferd blir påverka av andre
• økonomisk sosiologi – handlar om økonomi og samfunn
• politisk sosiologi – korleis kultur og andre sosiale strukturar påverkar politikken
• arbeids- og velferdssosiologi
• historisk sosiologi
• mediesosiologi – undersøker korleis media påverkar samfunnet og menneskelege forhold
• rettssosiologi – studerer korleis lover og rettssystem fungerer i samfunnet
• kjønnssosiologi – kjønn og samfunn

Sosiologar er som regel ikkje tilsette som sosiologar, men kan arbeide som mellom anna saksbehandlarar, forskarar, prosjektleiarar og anna.

Dei sosiologiske forskingsmiljøa står mellom anna bak prosjekt innan norsk samfunnsvitskap, som Kvinneforskingsprogrammet og Levekårsundersøkingane.