Advokat

Jobben til advokaten handlar ofte om å vurdere saker som klienten kjem med og gi råd om korleis saka kan følgast opp. For privatpersonar kan sakene gjelde for eksempel spørsmål om arv, skilsmisse eller nabokonflikt. Advokatar som jobbar med forretningsjus og har bedrifter og store selskap som kundar, blir blant anna brukt som rådgivarar i forhandlingar og når det blir skrive avtalar.

Vanlege arbeidsoppgåver for ein advokat:

• gi rettslege råd om kva som er lov og ikkje lov
• føre forhandlingar med ein motpart
• utforme juridiske dokument, som for eksempel testament, ektepakt, kontraktar og lignende
• representere klientar i sivile rettssaker
• forsvare tiltala i straffesaker
• bistå offera i straffesaker (bistandsadvokat)

Nokre advokatar jobbar med strafferett, enten som forsvarsadvokatar eller som bistandsadvokatar. Det er det offentlege som betaler desse oppdraga, men advokatane jobbar i eigne firma og er ikkje tilsett av staten.

Du kan også jobbe som bedriftsadvokat. Det vil seie at du er tilsett i bedrifta du jobbar for. Som organisasjonsadvokat er du tilsett i ein organisasjon, og utfører oppdrag for medlemmane i organisasjonen.

Advokatar i offentleg sektor kan for eksempel jobbe som:

• statsadvokat
• politiadvokat
• riksadvokat 
• annan type advokat for staten. Då representerer du staten og statens interesser
• kommuneadvokat. Då representerer du interessene i kommunen

Ofte kan klienten si sak bli løyst utan å gå til ein domstol. Nokre gongar skjer dette gjennom mekling, og mange advokatar har etterutdanning innan advokatmekling.

Viss ein konflikt berre lèt seg løyse ved å ta han til retten, vil det vere ein advokat som fører saka. Begge partar i ein konflikt vil då ha ein advokat til å representere seg, og jobben til advokaten er å framføre dei beste argumenta for klienten sin.

Nokre advokatar er allmennpraktikarar og tek saker innanfor dei fleste rettsområda, for eksempel innan familierett, pengekrav, kontraktsrett, fast eigedom og strafferett. Andre jobbar spesialisert med enkelte rettsområde, som for eksempel EØS-rett, patentrett eller selskapsrett.