Fotballtrenar

Dei aller fleste fotballtrenarane i Noreg er ikkje profesjonelle, men det finst eit stort og mangfaldig trenarfellesskap på fleire nivå. På breiddenivå trenar ein ofte barn, ungdom og vaksne i lokale klubbar, der fokus ligg på trivsel, meistring og utvikling. Mange av desse trenarane arbeider frivillig eller deltid.

På topp- og profesjonelt nivå handlar rolla meir om prestasjon og resultatutvikling. Med fotballtrenar som heiltidsjobb, leiar ein støtteapparat og samarbeider tett med klubbleiing, sponsorar og media. Begge nivå speler ei viktig rolle i norsk fotball, og mange profesjonelle trenarar byrjar karrieren sin i breiddefotballen før dei tek steg vidare opp i systemet.

Dei aller fleste fotballtrenarane er ikkje profesjonelle. Men, både i Noreg og mange andre land finst det etter kvart ei ganske stor gruppe av folk som arbeider som fotballtrenar på heiltid og får lønn for det. Dei fleste av desse jobbar innan klubbdrift/administrasjon og spelarutvikling, medan resten er trenarar for fotballag der hovudansvaret deira er å utvikla enkeltspelarar og fotballaget samla sett.

Nesten alle profesjonelle fotballtrenarar jobbar innan dei tre øvste divisjonane i landet på herresida, i toppdivisjonen på kvinnesida og med dei ulike landslaga i regi av Norges Fotballforbund.

Vanlege arbeidsoppgåver for ein fotballtrenar:

• førebu, gjennomføra og evaluera treningar og kampar
• planleggja og leia økter med fokus på teknikk, taktikk, fysikk og samspel
• analysera trenings- og kampvideoar for å utvikla enkeltspelarar og laget samla sett
• gjennomføra fysiske testar og følgja opp restitusjonen og treningsbelastninga til spelarane
• førebu kampstrategi og gjennomføra møte med støtteapparat og trenarteam
• observera motstandarlag og vurdera spelarar som kan vera aktuelle for laget
• følgja opp spelargruppa, støtteapparat, samarbeidspartnarar, media og samarbeidsklubbar
• laga veke-, månads- og årsplanar for laget

Arbeidsoppgåvene kan variera, og mange fotballtrenarar er underlagde ein hovudtrenar. Ofte har ein spesialisering innanfor eitt felt, og arbeider til dømes som målvakttrenar, defensiv trenar eller offensiv trenar. Ein profesjonell fotballtrenar bør bruka tid på å oppdatera og utdanna seg jamleg, fordi fotballen stadig utviklar seg som sport.

I mange klubbar finst det også eigne spelarutviklarar som i hovudsak har ansvar for dei yngre spelarane i klubben.

Som fotballtrenar må du rekna med å jobba på både dag-, kveldstid og i helgar. Det er samtidig viktig at profesjonelle fotballtrenarar er villige til å flytta på seg for å få jobb, etter som dei fleste arbeidskontraktar varer berre i to til tre år.

Moglege karrierevegar

Som fotballtrenar kan du utvikla deg på fleire nivå og område. Mange startar som trenarar for barne- eller ungdomslag i ein lokal klubb. Med erfaring og vidareutdanning kan du gå vidare til å trena seniorlag på breiddenivå, eller jobba som spelarutviklar. Nokon blir assistenttrenarar eller hovudtrenarar i toppfotballen, medan andre får høve til å jobba i profesjonelle klubbar eller med landslag. Du kan også spesialisera deg innanfor felt som målvakttrening, analyse eller fysisk trening, og bidra til utviklinga av enkeltspelarar på ulike nivå.

Sjå også idrettstrenar.