Fakta
Informasjon oppdatert
17. januar 2025.
Om studiet
Bacheloroahppu mas beasat ovddidit sámegiela!
Niegadat go don šaddat giellabagadallin dahje girječállin, dahje háliidivččet go máhttit eambbo sámi girjjálašvuođa ja girjjálašvuođa historjjás? Jus háliidat nannet sámegiela njálmmálaš ja čálalaš giellageavaheami, de lea dá rievttes oahppu dutnje!
Sámegiela ja sámi girjjálašvuođa bachelorgráda addá govda teorehtalaš ja geavatlaš máhtu. Sámegiela ja sámi girjjálašvuođa oahput addet dáidduid ja dieđuid sámegiela ja girjjálašvuođa historjjás, gielalaš diliin, girjjálašvuođa šlájain ja teorehtalaš čuolbmaásahemiin erenoamážit eamiálbmotperspektiivvas.
Oahpus beasat hárjehallat ja nannet sámegiela njálmmálaš ja čálalaš giellageavaheami. Oahppu duddjo buriid gálggaid sihke gielas, girjjálašvuođas, stilistihkas ja retorihkas.
Undervisningsopplegg
Oahpus leat sihke fysalaš deaivvadeamit Sámi allaskuvllas, ja muhtin rájes neahttaoahpahus.
Opptakskrav
- Oppalaš lohkangelbbolašvuohta dahje reálagelbbolašvuohta
- Sámegielmáhttu
Sámegiela gáibádusa sáhttá deavdit čuovvovaš vugiid mielde:
- Norgga joatkkaskuvllas sámegiella 1. dahje 2. giellan.
- Suoma logahagas eatnigielladutkkus dahje lohkan sámegiela vierrogiellan.
- Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde.
Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin.
Sáhttá maid ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul
Anbefalt forhåndskunnskap
Vurdojuvvo ahte ohcci máhttá davvisámegiela eatnigiel dásis, sihke njálmmálaččat ja čálalaččat.
Videre studier
Čiekŋudanvejolašvuođat
Bachelorgrádaprográmma kvalifisere sámegiela ja sámi girjjálašvuođa mastergráda oahpuide. Son guhte áigu joatkit mastergrádaprográmmii ávžžuhuvvo ovdal bacheloroahpuid čiekŋudanoasi juo plánet, makkár fágasuorggi son vállje masteroahpuin.
Karrieremuligheter
Bargovejolašvuođat
Oahppu addá gelbbolašvuođa bargat máŋggalágan almmolaš ja priváhta surggiin. Oahppoprográmma čađaheami maŋŋá sáhtát bargat earret eará giella- ja teakstakonsuleantan, giellabagadallin, girjjálašvuođa áššedovdin, kulturbargin ja girječállin. Oppalaččat oahppu lea ávkkálaš jus áiggut bargat sámi dieđalaš ja akademalaš birrasis. Jus Norggas lohká lassin praktihkalaš pedagogalaš oahpu (PPO), de dat addá gelbbolašvuođa oahpahit sámegiela vuođđoskuvllas ja joatkkaskuvllas.