Fakta
Informasjon er oppdatert av Høgskulen på Vestlandet
.
Om studiet
Vil du bli ingeniør men manglar fordjupning i matematikk og fysikk? På realfagskurset kan du ta dette på eit halvt år.
Kva er realfagskurs?
Realfagskurset er eit tilbod for deg som vil bli ingeniør, men som manglar fordjuping i matematikk og fysikk. Kurset går på fulltid, over eit halvt år. Det har oppstart i januar.
For å lukkast i kurset krevst det sterk motivasjon og ein høg arbeidsinnsats gjennom heile semesteret.
Du kan søke støtte frå Lånekassen for å ta realfagskurset.
Du kan også ta nett- og samlingsbasert realfagskurs på deltid over eit heilt år.
Studiets oppbygging
Korleis er undervisninga?
Det blir lagt opp til varierte undervisningsformer som inkluderer forelesningar, laboratoriearbeid, rekneøvingar og sjølvstudium. Forelesningar og rekneøvingar utgjer rundt 20 timar kvar veke. Du må i tillegg berekne å bruke tid på førebuingar og eigenstudiar. Realfagskurset blir difor rekna som eit fulltids studium.
Dei to faga som inngår i kurset er matematikk og fysikk. Pensum omfattar det vesentlege av fysikk 1, matematikk R1 og R2.
Undervisninga er på campus Bergen. Det er viktig at du deltek aktivt i kurset og stiller spørsmål når du treng det. Dei erfarne forelesarane våre er her for å hjelpa deg og sikra at du får mest mogleg ut av kurset. På Høgskulen på Vestlandet blir du ein integrert del av eit levande og engasjert studentmiljø der aktiv deltaking og fellesskap står i sentrum.
Kva er forskjellen på realfagskurs og forkurs?
Forkurset er for deg som ikkje har generell studiekompetanse, og inneheld derfor fleire fag enn realfagskurset: matematikk, fysikk, norsk, engelsk og teknologi og samfunn.
Realfagskurset er for deg som har generell studiekompetanse, men manglar fordjupning i matematikk og fysikk.