Programvareutvikling

Kvifor studere programvareutvikling?

Studiet vil gi deg eit solid vitskapeleg grunnlag og praktiske kunnskapar innan programvareutvikling. Du vil få ferdigheiter innanfor moderne systemutviklingsmetodar og teknologi, og kunnskap om korleis desse kan anvendast innanfor ulike domene. 

Masterprogrammet eignar seg særleg godt for deg som har dataingeniørutdanning eller ein bachelorgrad innan eit fagområde som informatikk eller informasjonsteknologi.

Studieprogrammet er ein fellesgrad med Universitetet i Bergen (UiB).

Programvareutvikling bruker idear og teknikkar frå informatikken til å løyse problem og utfordringar vi står overfor i verda i dag. Ein programvareutviklarar tar for seg område som:

• optimal yting i skya  
• behandling av vitskaplege bildedata (t.d. frå medisinske eller geologiske instrument) i sanntid 
• utviklinga i programmeringsspråka over tid 
• optimalisering av digitale ressursar som fleirlagskart for best yting 
• visualisering av fleirdimensjonale data for å gjere dei enklare å arbeide med og forstå
• utvikling av sikre databehandlingssystem som òg er etiske 

Du vil fullføre studieprogrammet programvareutvikling med brei kunnskap om moderne programutviklingspraksis og om det delområdet du har skrive masteroppgåve. Du kan:

• utvikle, bygge og teste ganske store informasjonssystem 
• forstå dei teoretiske, praktiske og etiske problemstillingane innanfor programvareutvikling og vitskapeleg forsking 
• bruke kunnskapen på ulike område (t.d. byggeteknikk eller medisinsk bildebehandling) 
• innovere og vidareutvikle programvareutviklingsfeltet