Dataingeniør

Kvifor studere dataingeniør?

Digitaliseringa i samfunnet skjer i rekordfart og behovet for arbeidskraft innan datateknologi er stort. Som dataingeniør kan du vere med på å utvikle og digitalisere framtida.

Datasystem blir brukt på dei fleste områda i samfunnet, frå helse og omsorg, til finans og media, handel og energiforsyning. Ein dataingeniør jobbar ofte i tverrfaglege prosjekt saman med andre fagfolk. 

Gjennom studiet lærer du om korleis datamaskiner fungerer. Du lærer å programmere og å utvikle programvare til alt frå enkle appar til store IT-system. Ei rekkje tema knytt til konstruksjon og drift av IT-system er også ein viktig del av studiet.

Du lærer: 

• grunnleggande programmering
• korleis ein kan samarbeide om større programmeringsoppgåver
• korleis ulike einingar kan knytast saman i nettverk
• om databasar og web-baserte system
• om algoritmar, nye teknologiar og trendar som til dømes VR-teknologi, datagrafikk, kunstig intelligens og stordata
• kunnskap som er nyttig i samband med spelutvikling

I siste del av studiet kan du velje mellom fleire med spennande spesialiseringar

• Programutvikling og -arkitektur
• Drift av datasystem og skyløysingar
• Web- og mobilteknologi
• Datagrafikk og brukarinteraksjon
• Kunstig intelligens og algoritmar

Du kan studere dataingeniør i Bergen.

Kva er forskjellen på dataingeniør og informasjonsteknologi? 

Dataingeniørutdanninga har dei same samfunns- og IT-faga som bachelorutdanninga i informasjonsteknologi, og den IT-faglege kompetansen i dei to studia er den same. Hovudskilnaden mellom dei ligg i nokre av matematikkfaga og i opptakskrava.

Bachelorutdanninga i dataingeniør er eit ingeniørstudium som følgjer den nasjonale rammeplanen for ingeniørstudium. I tillegg til dei tekniske faga, er det eit vesentleg innslag av realfag og samfunnsfag. Viss du vil bli sivilingeniør, må du ta dataingeniørutdanninga for å kunne søke vidare på masterutdanninga.