Utdanningsløp

Programområde for studieførebuande Vg3 innan naturbruk - Læreplan i felles programfag naturforvaltning

Naturforvaltningsfaget skal medverke til å fremme kompetanse i forvaltning av natur og ressursar med tanke på at naturen har eigenverdi og skal gi eit godt livsgrunnlag for menneska no og i framtida. Naturforvaltning har rotfeste i tradisjonelle, naturbaserte næringar samtidig som det legg grunnlag for berekraftig nærings- og samfunnsutvikling i eit nasjonalt og internasjonalt perspektiv.

Naturforvaltning kal gi elevane kunnskap om forvaltning av naturressursar på land og i havet. I dette inngår også naturforvaltning knytt til samiske område. Programfaget skal medverke til å gi elevane innsikt i naturbasert næringsutvikling og yrkesutøving der berekraftig forvaltning av naturressursar inngår. Programfaget har eit allmenndannande aspekt og skal medverke til å vekkje interesse og gi grunnlag for vidare studium innan tilknytte fagområde. Naturforvaltningsfaget kvalifiserer ikkje for eit spesielt yrke, men skal gi elevar kompetanse innan naturforståing og forvaltning som ein del av studiekompetansen, tufta på innsikt og ferdigheiter innan fagområdet naturbruk.

Opplæringa skal femne heilskapleg og tverrfagleg, byggje på tidlegare opparbeidd yrkeskompetanse og medverke til at eleven kan utvikle analytiske evner, kreativitet og samarbeidsevne. Opplæringa skal leggje vekt på det å kunne sjå ei sak frå fleire sider, vekte ulike interesser mot kvarandre, finne forslag til løysingar i konfliktsaker og setje forslag til løysingar om til praktisk handling. Opplæringa skal leggje til rette for personleg utvikling og gi grunnlag for livslang læring.

Les hele læreplanen på udir.no