Interaksjonsdesignar

Interaksjonsdesignaren teiknar skisser og strukturerer informasjonen som skal visast til brukarane av eit system. Eksempel på slike system er billettautomaten på bussen, menyane på mobiltelefonen din og nettsida du besøker no. Målet er å lage system som er enkle å nytte.

Interaksjonsdesign handlar om samspelet mellom menneske og maskin. Interaksjonsdesignaren nyttar kunnskap om korleis menneske leiter etter, oppfattar og finn informasjon.

Vanlege arbeidsoppgåver for interaksjonsdesignaren:

• teikne skisser og prototypar
• planlegge og lage informasjonsarkitektur
• gjere brukarundersøkingar
• analysere brukarane av produktet si åtferd og analysere statistikk

Interaksjonsdesignarar kan òg vere med på andre deler av produksjonen. Somme interaksjonsdesignarar lagar grafisk design, medan andre programmerer systema.

Somme interaksjonsdesignarar leier òg prosjekt, og har ansvar for kontakt med kundar. Interaksjonsdesignarar som driv eige føretak vil òg jobbe mykje med marknadsføring og  sal.

Interaksjonsdesignar er ikkje ein beskytta tittel, og kven som helst kan derfor kalle seg interaksjonsdesignar. Yrket har òg fellestrekk med mediegrafikarar, grafisk designar, mediedesignar og webdesignar.