Advokatsekretær - Yrkesintervju
Cecilie Wiese har varierte arbeidsoppgåver og organiserer arbeidsdagen sjølv i jobben som advokatassistent DNA.
Namn: Cecilie Wiese
Alder: 54
Yrke: Advokatassistent DNA
Arbeidsplass: Advokatfirmaet Thommessen AS, Bergen
Kvifor valde du dette yrket?
- Det har vel blitt ei blanding av tilfeldige hendingar og interesser.
Kva arbeidsoppgåver består yrkeskvardagen din av?
- Eg tek hand om og administrerar fire partnarar og fem fullmektige sine daglige behov for oppretting av nye klientar og saker i systema våre. Eg skriv og les korrektur på notat, e-postar, brev og liknande og eg produserar juridiske og faktiske utdrag til bruk i domstolane. I tillegg bestiller eg reiser, svarar på førespurnadar frå klientar, motpartar og domstolar og eg hentar inn opplysingar frå forskjellige kjelder, til dømes Brønnøysundregistra, Statens Kartvert eller Tinglysinga.
Kva utdanning og/eller kvalifikasjonar er naudsynte?
- Ein kan utdanne seg til å bli advokatsekretær på forskjellige privatskular. Dersom du er flink i norsk og engelsk i tillegg til å skrive raskt og nøyaktig på pc og å forstå systematikken i arbeidet ditt, treng du ikkje ei formell utdanning for å få jobb. Dei fleste advokatfirma har eigne system og rutinar som ein uansett må få opplæring i.
Kva er det beste med yrket ditt?
- Ein jobbar veldig sjølvstendig, og organiserer arbeidsdagen sjølv. I tillegg er arbeidsoppgåvene veldig varierte, og det er utfordrande å få jobbe med nokre av dei beste advokatane i landet.
Kva mislikar du mest med yrket ditt?
- Det kan til tider vere veldig travelt med store arbeidsoppgåver og korte fristar.
Kva andre arbeidsområde/mogligheiter fins innanfor yrket ditt?
- Etter tre år i praksis som sekretær har ein mogligheit til å begynne utdanninga til den beskytta tittelen Advokatassistent DNA hos Juristenes Utdanningssenter. Studiet er ei innføring i jus, og ein studerar på deltid i eitt og eit halvt år før ein tek ein praktisk og teoretisk eksamen.
Ein kan også få seg jobb innan det private næringslivet, til dømes i forsikringsselskap, oljeselskap eller andre som har eigne juridiske avdelingar, og kan tilby relevant arbeid. Ein kan dessutan få seg jobb i domstolane, hos politiet og i dei fleste andre offentlige etatar.
Kva kan ein forvente i løn i dette yrket?
- Det kjem an på kvar ein jobbar, men i det private kan ein rekne med ei byrjarløn på om lag 280 000 kr, toppløn kan vel komme opp i 450-480 000 kr. I det offentlege er løna generelt lågare.
Korleis ser du sjansene for å få jobb innen dette yrket?
- Med utdanning som advokatsekretær trur eg det er svært gode sjansar for å få seg jobb.
Tekst og foto: Maria Pile Svaasand
Oppdatert:
6 des 2011
Del:
